ඉතිහාසය

මාපාකඩවැව ග්‍රාමයේ දුවා දරුවන්ගේ නුවණැස විවර කරමින් 1956 ජනවාරි මස 01 වැනිදා මාපාකඩවැව විද්‍යාලය සිසුන් 42කින් ආරම්භ විය. මහියංගන බදුල්ල ප්‍රධාන මාර්ගයට මායිම්ව ඇති මෙම විද්‍යාලය අක්කර 10 යි පර්චස් 30 ක වපසරියකින් යුක්ත වන අතර මහියංගන කලාපයේ ඕනෑම ස්ථානයක සිට පහසුවෙන් ළඟාවිය හැකිය.

ප්‍රධාන මාර්ගයට යාබදව ක්‍රීඩා පිටිය පිහිටීම නිසා ක්‍රීඩා කටයුතු වලට ද පහසුය. පසු ගිය වසර කිහිපයක දී ම ක්‍රීඩා තරඟ වලින් කලාපයේ ඒ සියලු පාසල් අභිබවා ප්‍රථම ස්ථානයට පැමිණි අතර ඌව පළාතේ හොඳම පාසල් දහය අතරට ද තේරී පත්විය. දැනට මහියංගන කලාපයේ ක්‍රීඩා පාසලක් ලෙස ද මෙම විද්‍යාලය නම් කර ඇත.

බ/ මාපාකඩවැව විද්‍යාලය ලෙසින් ඇරඹි මෙම විද්‍යාලයේ උසස් පෙළ කලා විෂය ධාරාව 1973 ආරම්භ කරන ලදී. 1974-03-16 දින මෙම විද්‍යාලය මහා විද්‍යාලයක් බවට පත්විණි. 2001 වර්ෂයේ දී මෙම විද්‍යාලය මධ්‍ය මහා විද්‍යාලයක් බවට පත් විය.

මහියංගන අධ්‍යාපන කලාපය තුලත්, ඌව පළාත තුළත්, අධ්‍යාපනික ප්‍රතිඵල තුළින්ද, විෂය සමගාමී හා විෂය බාහිර ක්‍රියාකාරකම් වලින් ද සමස්ත ලංකා මට්ටමේ විවිධ ජයග්‍රහණ අත්කරගෙන ඇති මෙම විද්‍යාලය වර්තමානයේ බ/බණ්ඩාරනායක මධ්‍ය මහා විද්‍යාලය (ජාතික පාසල) නමින් මහියංගන අධ්‍යාපන කලාපයේ කැපී පෙනෙන පාසලකි.

මෙතෙක් ආ ගමන් මගේ නියමුවෝ